Жобаның атауы:

Қазақстанда шенеуніктер мен олардың жақындарының кірісі мен мүлкі туралы декларация әлі күнге дейін ашық емес, ал бұл ақпарат әлдеқашан ашық болуы керек еді.

Біріккен Араб Әмірліктерінің ең ірі қаласының бірі Дубай қымбат жылжымайтын мүлікке инвестиция салатын орталыққа айналды. Бұл жерден тұрақты тұратын немесе арасында келіп тұратын, не жалға беретін виллалар, пәтерлер мен тұрғын үй кешендерін сатып алады.

Дүние жүзіндегі жүзден астам медиа қатысқан жаңа ауқымды зерттеу жұмысы 2022 жылғы жағдай бойынша үкіметпен, мемлекеттік корпорациялармен және қылмыстық топпен байланысы бар мыңдаған адам Дубайдан жылжымайтын мүлік алуға ақша салғанын көрсетті.

Элитаға арналған пәтерлер мен вилла иелерінің арасында мыңдаған қазақстандықтың есімі бар. Дубайды елдің тағы бір астанасы деуге болады.

Шетелден мүлік алу заңға қайшы болмаса да, шенеуніктер мен олардың туыстарының Дубайдан пәтер мен вилла алғаны туралы ақпарат ашық болуы керек.

«Власть» ауқымды зерттеу жұмысына қатысушылардың бірі ретінде «Дубай: Қазақстанның тағы бір астанасы» жобасында осындай меншік иелері туралы ақпаратты жариялап отыр.

Мұны шенеуніктер мен олардың туыстарының декларациясының ашық болуына жасалған алғашқы қадам деп есептейік.